تعسفات..قهر ..ظلم..استبداد..تحطيم للحياة..كل هذا واكثر يتعرض له عارف الدحوه (امين مخازن المؤسسه العامه للكهرباء) بمحافظة عدن (سابقا) لفترة 27عام والذي تم فصله في غمضة عين عندما رشح نفسه وكان رمزه الانتخابي (الحمار) فاصبح يدعى بحمار عدن .. وأصبح يتهم شعاره الحمار بادخالة السجن، حيث تم اتهامه باختلاس اموال من الكهرباء إلاّ أن المحكمة برأته فلم يجد المتضررين من حماره سوى قطع معاشة وحرمان أفراد أسرته منه فلجأ مؤخراً بدوره إلى المحكمة ليقاضي إدارة الكهرباء ويستعيد معاشة مردداً ( قطع الرأس ولا قطع معاش الجهال) وقد أصابته حالة من الهستيريا .. (المستقلة ) التقت به وأجرت معه الحوار التالي:
> أيش معك دائما في المحكمة؟
– حصان المؤتمر زعل من حماري وزبطني والان دخلنا أنا وهوه شريعة ..
> البلاد ديمقراطية ليش زعلان؟
– ما ناش داري طلعوا اسمي في الانتخابات وسقطوا حماري..
> أين سقط؟
– اتكرفس بعقبة الكهرباء فوق حصان المؤتمر ..
> ما دخل الكهرباء بحصان المؤتمر؟
– أركب بابور بخمسين ريال روح اسألها ..
>اشتيك انت ترد على سؤالي ؟
– لأن الحصان يشتي شاحن وحماري مشحون طبيعي وهم يشتوا كل حاجة للحصان..
> قصدي – فهمنا أكثر من شان القراء؟
– ركز معي يمكن الرئيس يقرأ ويرجع راتبي .. أتزاعلنا انا وأصحاب الحصان والكهرباء كانت موجودة لانها ما تطفاش أيام الانتخابات وقالوا لي لا تربطش حمارك جنب حصان المؤتمر بايعورك وقطعوا راتبي وسنتين لا حدك والآن لا الحصان انبطح ولا رجعوا راتبي.
> ليش اخترت شعارك الحمار ؟
– لأنه يشبهني ويشبه الشعب اليمني لما يخزن مايشعرش بالزبط .
> ماتزعلش من (لقب الحمار)؟
– أزعل من الحمير لأنهم مضارب وما يزعلوش.
> ليش الكهرباء دائما طافي في عدن؟
– حكومتنا تشتي سوق المواطير ينتعش من أجل أصحابها أما النزيهين ترجعهم فاسدين ..
> مافيش معك احد يشارع لك الكهرباء من أجل راتبك؟
– أمي مرضت وبتروا رجلها وانا في المحكمة أشارع مامعيش ريال .. وأشتي راتبي.
> أيش نصيحتك لأبناء عدن من الكهرباء؟
– لايقربوش جنبها لأنها تزابط وما احد يقدر يشارعها كرشها مليان.
> أعطينا نسخة من الملف على شان ننشره لك؟
– الملف مكهرب.. خلينا أخبيه تركة لأولادي .
> طيب يالله خاطرك؟
– فين رايح قلبي مليان مشاكل وجيبي فاضي من الرشاوي.
> خلاص فرغة الى وسط ملف وانا برجع لك.
– قده شتفرغ وأنت سير روح لك لاعاد تجيش لاعندي ما اشتيش اتعبك مثل ماتعبت القاضي..